于洋唔嫌錢少嫌戲少

    “無線畀我的加幅逾十多個百分點，人工已見頂了。”服務TVB三十年的老戲骨于洋，離巢回流加國；不為錢少而為戲份少——簽了合約，按月硬性要還騷。“就算唔啱都要塞畀演員，總之，欠騷就要還。”“即如《異搜店》店員一角，對白少、又唔適合自己都照拍。坦白講，隨便搵個人去演都可以，冇癮！走人。”于洋説。

    “無線許多時劇本亂咁來，”于洋臨別贈言，“更大問題係唔識留住人才。”他強調要畀演員合理待遇，他指在無線拍劇成日無時間瞓覺，但外邊劇組起碼會畀十個小時休息時間，亦唔會太過壓低人工。在深圳拍攝《家族榮耀》時，劇組安排于洋住酒店套房，令他印象難忘。

    兩年前，于洋已約滿，向監製道別時，被問到有部《家族榮耀》，想唔想拍？于洋近年鍾意戲份吃重的角色，但天生記性不大好，所以要花時間消化角色，不料接演的是“老爺”馬世宏一角。於是他趁隔離期間，在酒店將劇本睇完又睇，結果令退休返加拿大的計劃延期。最終在今年五月起程返加的于洋説：“也許幾個月後，我會回來。”盛傳《家族榮耀》原班人馬開拍新劇。

    據講，薛家燕早年於劇集《眞情》中演好姐，編導要給她配一個老公，以增溫馨。係家燕姐主動提出，一個電話便請了加拿大的于洋回來，夫妻戲演來登對合拍。兩人亦毫不諱言曾同讀一間中學、青梅竹馬，後因家長反對而作罷。能在熒幕重續未了緣，亦藝壇佳話。

    七十三歲的于洋，行走影視圈半個世紀，多年來穩坐男主角地位，在無線常演皇帝、爸爸、富翁的角色，頗有型格。他在無線的告別作是《金宵大廈2》，給觀眾留下的印象太毛骨悚然了：飲珍珠奶茶竟被飲管插死，成為詐屍。好戲之人，難怪要尋找新天地了。

    高  梁