處男個唱挑戰四面台

    馮允謙拍海報谷胸肌

    馮允謙昨日宣佈於七月舉行一連三場演唱會，並首度挑戰四面台。演唱會海報同步曝光，只見馮允謙穿上貼身上衣，胸肌脹卜卜、若隱若現，非常吸睛。

    今年是馮允謙(Jay)出道十周年，創作與歌唱成績屢創佳績。昨日Jay宣佈於七月二至四日假九龍灣展貿中心舉行一連三場演唱會，並首度挑戰四面台。演唱會昨日同步海報曝光，一向“守身如玉”的Jay，激罕解開衫鈕，貼身上衣脹卜卜、胸肌若隱若現，非常吸睛。

    演唱會海報曝光後，立即掀起粉絲圈熱話。繼Jay去年的“吸血獵人”造型深入人心，今次他卸下黑色西裝和大褸，在個唱海報中展現陽光和性感一面，令人眼前一亮。他說：“今次拍攝海報時，在設計師Kenji屋企花園取景，藍天白雲、仲有小河流，好有大自然感覺。今次影相最大挑戰，係我前兩日同屋企人到郵輪上玩，好開心、食咗好多嘢，到影海報時就知驚！”

    海報中的Jay穿白色上衣，露出結實胸膛，粉絲看得熱血沸騰。拍攝團隊更為粉絲謀福利，不停解開Jay的衫鈕，挑戰他的性感尺度。Jay笑言：“唔知點解工作團隊個個都想我騷少少胸肌？不停除我的衫鈕，有少少尷尬，好驚肥膏咇晒出來！多謝攝影師好叻，所搵角度都影到好靚！”

    今年是Jay出道十周年，可以夢想成真舉行個唱，令他非常興奮和期待。他表示最感激一班忠粉：“最多謝係粉絲，好多由我初出道就一直陪伴，畀好多鼓勵和支持。有段時間我冇晒自信心，甚至想放棄唔再做歌手，係佢哋冇放棄我、不斷傳訊息叫我加油、成日問我幾時出歌，畀咗好大力量令我堅持。我會做好今次演唱會報答佢哋。”除了粉絲和家人，Jay亦希望邀請合作過的歌手朋友來睇騷，分享喜悅。

    距離個唱倒數尚餘七十天，Jay透露正努力減磅。他說：“去年減咗十五磅，但自從爸爸返香港同我一齊住之後，呢半年日日煮好多好味的菜畀我食，我唔食佢會嬲。作為孝順仔一定要食晒，結果重咗十磅，就快開騷，我真係唔可以再食。”因為要排舞練歌，加上工作量大增，Jay減磅計劃順利進行中。

    另一挑戰是背歌詞，Jay笑說：“我記性唔好，要記晒中文歌詞要花好多時間。所以我將演唱會的歌放晒入Playlist不停聽，瞓覺都聽，希望發夢都記得。”