等疫情停歇再開新劇

    林文龍否認三台打仗

    林文龍昨日率領黃德斌、陳雅麗及崔加寶等出席網劇發佈會，林文龍被問到該劇是否要與無線新劇打對台？他就說沒有與其他媒體夾過播映時間，笑言：“我從來冇夾嘢，我只夾餸。”

    亞洲心動娛樂(AMM)副總裁林文龍昨日偕藝人黃德斌、麥子樂、黃又南、林耀星、陳雅麗、崔加寶等出席網劇《逐流時代》發佈會，女主角麥明詩昨日缺席。問黃德斌對新劇有沒有信心？他認為值得收看。早前有報道指他於劇中與麥明詩有激情戲？黃德斌說：“講呢啲！套劇現實得來又有啲抽離，值得觀眾去睇。激情戲只是其中一場，還有激心、激氣的劇情。（最值得睇同麥明詩的激情戲？）戲裡面大把啦。（嚇到佢今日唔敢現身？）可能怕醜啩，佢唔得閒啩。”他透露自己的角色慾望好強：“會用好多方法鞏固自己位置，劇中主線三兄弟有不同追求，其中包括海味店太子爺想轉到金融世界打滾。”

    被問外間形容《逐》與無線的《金宵大廈2》、ViuTV《反起跑線聯盟》打對台，林文龍說：“只係字眼上咁寫，唔使太在意，邊度有得打！大家的方向、做法都唔同，佢哋係電視台，我哋係網台，觀眾隨時可以看，不需要坐定定收看，多謝大家吹捧話係三台打仗。而且我哋都有個創新做法，廿二分鐘一集，節奏會好快。（用App播會唔會輸蝕？）依家你問一百個後生仔，九十九個都係上網睇片。睇大家鍾唔鍾意這作品，同埋有冇心，都要配合天時地利人和。（AMM今年再開劇？）我哋唔係大公司，唔會簽好多藝人，開綜藝節目還可以，開劇就要等疫情停咗，唔係拍吓停吓，咁就好似將錢掉落鹹水海。”