黃偉文要退選百大俊男

    美國某網站公佈“世界百大俊男美女”入圍名單，填詞人黃偉文亦驚現其中，昨日他更於社交網站發表“退選宣言”。

    美國網站TC Candler日前公佈“世界百大俊男美女”入圍名單，多名入圍的香港男女明星卻被網民質疑，認為該榜公信力不足。網民亦發現該網站其實有講明有畀錢的話，網站就唔可以否決課金者提出的人選。前晚該網站再公佈新一批入圍者，當中乍現香港知名填詞人黃偉文(Wyman)。但Wyman得知自己入圍“世界百大俊男”後，似乎感到萬分尷尬，即時於TC Candler的官方IG詢問可否撤回他的提名。有香港網民留言表示：畀“Wyman笑到我喊！”

    Wyman昨日再於社交平台發表“退選宣言”：“首先，成件事我並無參賽、完全被動，被提名都唔知咩事。陪大家開個玩笑、被大家惡作劇一下，為疫情中提供一點歡樂，係OK的。但我係冇份用任何方式搞自己入去呢個名單中，非我性格、亦非我所求，唯獨呢件事一定要講清楚。”Wyman話自己知自己事，希望大家笑完就算，亦希望大家尊重他，跪求官方讓他退選。他更誠心問網民：“真正最想問吓有冇得唔接受提名？或者要求有關方面將我除名？”