與七小朋友拍劇

    梁詠琪拒母女檔上陣

    梁詠琪主演的新劇近日開播，她表示廿幾年前已覺得拍劇係大勢所趨，早有計劃遇上對的劇本及角色就會接拍，但直至今時今日緣份才到，不過她就堅拒母女檔演出。

    梁詠琪(GiGi)為ViuTV新劇《反起跑線聯盟》演女一，她透露今次被打動，全因該劇屬貼地家庭式喜劇：“在疫情期間能帶出正能量，觀眾會得到共鳴。”加上GiGi與導演劉偉恆相識十多年，大家都為人父母，見面就一齊分享仔女經，所以在劇集籌備過程中，GiGi都有幫手度劇本，最後由她主演就變得順理成章及圓滿。

    GiGi早在二○○四年已客串TVB劇集《天涯俠醫》，演張家輝已過世的女友。她坦言廿幾年前已覺得拍劇係大勢所趨：“早有預算有朝一日遇啱劇本及角色就會接拍，但直至今時今日緣份才到。”不過她就堅拒母女檔演出：“仲未係時候，我想囡囡先專注自己的學業及生活。”

    GiGi表示拍劇過程中，最開心可以跟潘燦良及周家怡一齊演出，劇中的老公強尼更是“正到不得了”。她笑說：“呢個配搭好有新鮮感，與七個小朋友做戲亦算順利。佢哋好聰明，唯一係我要適應跳拍。”點解唔以現實中的母女檔上陣呢？GiGi立即耍手擰頭：“我做戲仲要顧埋佢，我搞唔掂！雖然有人搵過我哋，但暫時佢冇興趣拍戲，佢只係鍾意唱歌。而且佢冇演戲經驗，麻煩到別人就唔好喇。暫時冇呢個計劃。不過小朋友諗法成日變，第日再問佢意願都唔遲。”

    不論戲裡戲外， GiGi都支持“反起跑線”，堅持讓囡囡開心健康地成長。她透露：“疫情下冇乜出街，留在屋企日夜對住小朋友。要在局限環境下安排好每日時間表、搜羅好多益智遊戲同佢一齊玩，同佢建立共同興趣，令佢身心可以健康發展，真係一個好大工程。”

    GiGi亦冇安排囡囡上補習形式的網課：“我個女適合輕鬆學習，除了學校安排上Zoom，其他大部分時間都係玩。要配合佢學習能力，係冇得迫。其實在疫情下，佢做晒份內事，刷牙、洗面、做好功課就得。”