疫情下先註冊後擺酒

    吳浩康郭思琳雙喜臨門

    吳浩康與郭思琳日前宣佈結婚，一對新人昨日註冊並舉行戶外小型婚禮。由於是在疫情期間舉行婚禮，吳浩康表示未能邀請太多親友出席，但一定會補辦婚宴。

    三十八歲的歌手吳浩康(Deep)與三十五歲的“格鬥女神”郭思琳(Margiela)去年開始低調拍拖，本月五日，Deep在社交平台宣告“雙喜臨門”，表示已成功向郭思琳求婚，兼且女方已佗B三個月。兩人於昨日註冊並舉行戶外小型婚禮。吳浩康表示因應疫情期間未能邀請太多親友出席，但一定會補辦婚宴。

    婚禮上當然少不了“愛的宣言”，Deep謂諗了好多個晚上：“都係圍繞多謝佢，多謝佢願意嫁畀我、願意同我一齊去經歷人生、願意同我一齊去遮風擋雨。我哋各自對大家的承諾就留返畀我兩夫妻啦，多謝大家祝福、多謝大家關心。”Margiela說：“佢同我結婚已經係一個承諾啦，所以佢唔使講，我已經收到晒。”

    兩人透露準備婚禮期間亦發生不少蝦碌事。Deep謂：“過程雖然好簡單，但係蝦碌事件都多。因為依家速遞、運輸都受到影響，所以我哋訂咗好多裝飾物都用唔到，最後我哋係山邊執樹枝去完成裝飾。”Deep表示一定會補辦婚宴：“之後一定會補擺婚宴，但我哋想先註冊，所以今次唔好意思，請唔到好多朋友，所以多多見諒。”正式簽字註冊時，兩人更是喊唔停。Deep謂：“註冊好緊張，冇諗過咁緊張，好感動！特別係我見到爸爸，其實我冇乜點停過喊。”Margiela見Deep喊到“決堤”，自己都忍不住喊埋一份：“我冇諗過會喊得咁犀利，我一見到佢喊、我又忍唔住喊，佢太眼淺啦，我成日要安撫佢。”

    問到Margiela婚後第一課，她笑說要“見識”婚姻的恐怖：“我覺得有太多嘢要去學習，尤其是要學做一個好太太、好媽媽。兩人相處係人生課題，太多嘢要學，好多人都話結婚之後係另一個境界，我都想快啲經歷，睇吓有幾恐怖，哈哈。”

    除了成為人夫， Deep亦快將成為爸爸。問到首胎是仔定女？Deep表示要保持神秘感，暫不透露：“其實仔或女都會好鍾意，因為我好期待。依家我兩個都係專注第一個小朋友，因為係第一次做爸爸媽媽，所以有好多嘢未知、好多情況要兼顧。” Deep透露老闆楊受成送上大利市給BB：“楊生話會封大利市畀我個BB，其實收到老闆的祝福已經好開心啦！因為老闆真係睇住我成長，照顧咗我廿年，都係我半個爸爸。有自己咁尊敬的人的祝福，其實已經係好大的禮物。”