肥媽教煮心靈雞湯

    有觀衆稱肥媽為“教煮”，亦有指肥媽係“教食”：面對一粒花生，你要食到“人的心”，才是天下最佳美味！

    “我教過一位長輩，”人生經歷豐富的肥媽坦承曾向老人家“教食”：“新抱買粒花生畀你，個心都係有你。我覺得做長輩，任何人肯買嘢畀你，你都係要開心的。”

    肥媽亦係“教煮”，幾十年在家中做“煮飯婆”，身懷馭夫秘術：“要鎖住男人個心，就要鎭住他的胃。因為，他習慣咗你的煮食，他外出食其他東西就會唔開心。外出勞碌的男人，永遠都認為食住家飯係最好味最幸福的。”

    《煮 · 野食》毋須東奔西跑了，新一輯開始回歸“肥媽廚房”，推廣抗疫三餐，聽講再表演拿手的“電飯煲功” 。其實肥媽表演過幾次了，二十分鐘內，兩餸一飯整煲送上，簡單便捷，熱氣騰騰。雖然只係青菜肉餅之類，但放工返家能有一頓熱飯菜、一家團聚喜氣洋洋，食到的是親情了。

    山野煮菜，遇上六號與女友拍拖周年紀念。面對湖光山色，正好山盟海誓，肥媽鼓勵求婚，“冇花噃！”肥媽打個眼色，六號醒目，捧起一大個椰菜花。肥媽隨即炮製一道意頭菜：西芹、雲耳炒蓮藕，菜名“佳偶天成”，祝福六號與女友有情人終成眷屬。食之於味，各如其面，世界上最難令人滿意的職業就是廚師。鹹甜肥瘦煎燉炆煮，各有所好， 難能可貴是人情味——烹飪的眞諦是：有情飲水飽，無情食飯飢。

    肥媽聰明之處是，歷來拍烹飪節目都是煮住家飯，青菜咖喱薯仔，從未見山珍深海魚；簡捷妥當，但求“大人食飽畀心機工作，細路食飽畀心機讀書”。六號也聰明，《煮 · 野食》帶上秀色可餐的女友，互相餵食曬恩愛。好唔好食呀？一定話好好食的。食嘢抑或食情？你話呢！

    高梁