昨日賽事總投注二百八十七萬

    張志立劉志森起孖

    昨天草地賽完結。是仗戲碼較佳，六場總投注額共二百八十七萬元。

    頭場八駒角逐熱倒冷爆，錢廄“國金詳聖”由張志立主轡後上掄元。此雙人馬上次沙地開齋，勝後原装人馬乘勝追擊，今次轉戰草地，同場有廄侶“國金軒”孭重飛，變成十一倍冷門。騎者出閘慢半拍，全程追趕至入直路發力，將對手一網打盡。人馬取連勝，錢健明增添一W。

    第二場梁曉傳替譚廄“石澳泳灘”開齋。此駒季內屢拼未出頭，上次跑短途力拼走勢接近。今次原裝配搭增程再戰，出閘應聲彈出，全程貼欄疾走，一氣呵成帶返終點，贏來“魚生粥僅僅熟”，替馬匹打開來澳勝利門。譚文就、梁曉傳攜手添進帳。

    第三場中野省吾騎適廄“幹細胞”勇挫馬王“耀昌之星”。此駒上次林凱成熱門倒灶，今次換上中野省吾操刀出閘快如飛，三扒兩撥透出，全程領放直帶到尾，贏至對手無力招架，替馬匹補中。“幹細胞”今次造出快時間，贏來令同組馬食塵。中野省吾、王君適攜手添頭馬。

    第四場任布利爆冷贏高廄“縱橫大師”。此駒近期連敗多仗無建樹，今次唞夠吼準形勢出擊。騎者出閘快步跟出，全程緊扣韁繩，至直路發力衝刺一攻而破，爆二十倍冷W。摩利高、任布利齊添進帳。

    第五場高君濤贏馬。此子騎劉志森廄“海洋之星”大熱掄元。此駒久無頭馬見面，上次跑沙地無功而回，今次回配高君濤跑草地捧成大熱門。騎者出閘守好位，入直路發力衝剌，將對手一網成擒，替馬匹取得遲來的頭馬。

    尾場張志立起孖，此子贏劉志森廄“不醉無歸”。此雙人馬上次贏完千五米增程再來，今次跑千八米捧成熱門。騎者出閘採取留前鬥後戰術，入直路發力甩開對手直奔終點，人馬打疊取兩勝表現悅目。張志立喜中二元並替劉志森完成起孖任務。