關寶慧難忘濕吻張慧儀

    由張慧儀、廖子妤主持的香港開電視節目《曬ya馬拉moi》，本周邀來請了關寶慧當嘉賓，張慧儀親自為好閨蜜下廚炮製馬拉菜；關寶慧則透露自己一直為張慧儀物色男友，希望佢早日結良緣。

    兩人在節目中大談“那些年”的飲酒瘀事，張慧儀說：“你知我啦，成日都會招惹狂蜂浪蝶，有次飲完酒要走，有個好英俊嘅外籍人士同我搭訕，冷落咗你。”關寶慧聞言即說：“係啦，都冇人同我搭訕！咁啱我見到有個朋友行過，於是我大叫佢‘衰人’，嗰個人望住我四、五秒，跟住我仲問佢係咪住呢度，講完一輪原來係我認錯人，我以為佢係羅君左！”

    兩人重提因合作拍攝電影《變態殺人狂》而成為好友。張慧儀說：“同佢開工就好多蝦碌事，日日笑、一坐埋就笑，都唔知笑咩。我第一次做女同志，我哋仲要接吻。”關寶慧續說：“係濕吻！我記得拍呢場戲拍咗好耐都拍唔到，一埋牙我哋又笑，因為要同好朋友咀嘴，笑到導演都有少少嬲。其實我覺得有啲尷尬，後來諗死就死啦，快啲拍完佢啦。”自從拍完這次咀戲後，兩人從此變成“一對”。