電視名菜眞假難辨

    美食天堂新貢獻：一粒牛丸九成係雞肉！《東張西望》反映民意：老婆餅冇老婆、菠蘿包冇菠蘿。早已馳譽啦！高梁大叫一聲“好彩”，若時光倒流十八世紀，這些奇趣食品實會成為貢品，多少廚神與餅聖要成刀下鬼了——欺君！

    腦海中翻騰經典劇集場面，乾隆有三道名菜：龍鬚湯、韮菜餃、清炒雞丁，都是假無可假、真無可真的。

    乾隆有鋪癮，喜與母后共晉午餐。這個深宮小廚房，都是妙廚現炒現食。大雪天，一盤熱騰騰韮菜餃子，香噴噴。乾隆越吃越奇，甚香甚和味，冇韮菜嘅。廚娘跪稟：半夜採韮菜，榨取汁液，混於粉皮和肉餡，無韮勝有韮也。

    清炒雞丁上桌，無醬汁、少油膩、入口煙韌無渣，好有雞味。精明的乾隆吃了兩粒便發現不對勁，雞肉唔黐實雞皮的！廚娘跪下說：不敢隱瞞，此是豆腐，浸於濃濃雞汁中燜煮一日一夜，撈出、曬成豆腐乾、切成雞粒狀，再鋪上真正雞皮。非雞實雞，比真雞更和味也。

    第三味係龍鬚湯。清湯看似大豆芽煮成，乾隆大讚好味、好爽、好脆口，甚麼豆發的芽？魚有鬍鬚麼？“鯉魚有兩條鬚，熬湯至鮮的，這碗魚鬚湯價值五十両。”乾隆拍桌！他自認是愛民天子，正値雪災，京城不少難民流離捱餓。飲碗湯也要五十両，豈不成了奢靡昏君？廚娘醒目，伏地乞求容稟：在大雪天，這些鯉魚鬚是奴才平時儲下來的；又不時到御廚房撿拾，此屬廢棄廚餘，可說値五十両，也可以說一文不値！

    三味太后御廚秘製名菜，乾隆下旨：“不得宣揚！勿以為朕係好色好食之昏君也。”睇戲唔好駁戲，聊博一粲耳。

    高  梁