陳嘉寶生三千金宣佈封肚

    陳嘉寶(Anjaylia)月初順利再生一女，誕下第三位千金，母女平安，BB女亦成為今年首位星B。

    Anjaylia的預產期本來在去年尾，但一如媽媽所願，BB待Anjaylia歡度聖誕及元旦後才出世。

    在誕下BB一刻，Anjaylia感動極了：“尤其係醫生將剛出生的BB擺在我心口、畀我抱咗好耐。之前兩個女都冇畀我抱咁耐，上一刻明明在肚裡面，突然之間就出咗世、擺在我心口上面，感覺好神奇。”

    Anjaylia透露BB出生時重七點二磅，並已取名Azaliah：“呢個英文名係出自聖經的，我知道實會畀人話我幫囡囡改的名都好難讀，哈哈！其實呢個係一個傳統，因為先生近五代都係基督徒，呢幾代人都係會在聖經中搵英文名，我哋都要跟返傳統。Azaliah同我個名讀音都好似，就當係送畀自己的禮物。中文名就留返畀爺爺改，中文名都係想向長輩致敬。”

    年紀輕輕已為三女之母，Anjaylia也宣佈封肚！她說：“依家播緊我有份參演的ViuTV《IT狗》，等我坐月時可以睇劇輕鬆吓，好開心呀！依家好好調理身體，就有動力做自己想做的事。對於BB的期望？當然係最緊要健健康康、開心平安。我同先生意向一致，就係生仔生女都冇所謂，最大目標係希望有三個小朋友、年紀接近，可以一齊成長係好開心的事，我已經完成呢個壯舉！大女同二女一齊玩，大女會識得保護妹妹，二女學嘢都會學得好快，證明呢個策略成功！”

    此外，早前Anjaylia的一班好友為她舉行產前派對，她笑說：“好開心！因為我超級懶，咩都唔想搞，亦唔想朋友破費。我只係希望可以同一班好親密的朋友傾吓偈、食餐飯開心吓，點知一班朋友就幫我安排咗一個派對。最好笑其實係我同老公、一班朋友一早已經知道BB性別，但大家為幫我一嘗心願，畀機會我篤波波（揭露BB性別的儀式）、過一過癮，真係好冧。”