飛機師執照變雪藏牌

    莫麗淇年賺半億

    香港網紅莫麗淇、香珮汶、陳倖瑤、關悅鳳、小豆等日前為網絡平台拍廣告，並邀請攝影師Raymond Kam操刀拍攝。受疫情影響，莫麗淇的飛機執照慘變“雪藏牌”，她笑言要花時間再進修操機。

    莫麗淇(Niki)近日被封“半億主播”，篤爆她賺取半億平台貨幣，市值近六百萬港元。她表示：“疫情下有咁樣收入梗係滿意啦，但係就唔刻意諗點花呢筆錢，留住先囉！早前我有份參演妮歌潔曼的新劇《Expats》，劇組真係超級細心，有專人會照顧你凍唔凍、幫你換鞋，仲有人負責特技、佈置外景，真係好勁。但突然間成個場景橫風橫雨！不過導演同妮歌潔曼有冇‘打大風’？呢啲唔好講啦。近日可能受到疫情影響，暫時仍未收到拍攝通知，我會準備檔期隨時再拍攝。”

    受到疫情影響，Niki的飛機師執照慘變“雪藏牌”，她笑言要花時間再進修操機：“其實我都好熟悉揸飛機，但可能要半小時去溫習搵返啲感覺。要等到冇疫情的時候，返美國再進修吓飛行知識。”

    另外，同場的靚媽Model香珮汶亦因為疫情關係，暫停囡囡的廣告工作：“因為囡囡只係得兩歲，就推晒工作唔敢接。我單獨直播都要先問清楚，例如工作人員打齊針未？如果太多人的場合未必會做。”她指去年直播收入甚佳，囡囡更不時“亂入”呃禮物：“其實做直播時囡囡會無啦啦入鏡，啲人見佢咁可愛，就會送禮物畀佢，大家仲幫佢改咗個名叫小主播。佢由細細個開始，已經自己識賺奶粉錢，比我仲有天份。看來我未來會係她的星媽經理人。”

    關悅鳳(Angela)透露受疫情爆發影響，打亂搵錢大計：“幸好早前聖誕節時，與堂家姐在家中下廚煮聖誕大餐，成功取悅家人及長輩。”